‘Jäöghoeglösteg paar vaan Groet Mestreech’ dit jaor oet ‘Hare’
16 november 2024
‘t Jäöghoeglösteg paar vaan Groet Mestreech kump in 2025 oet Borgharen.
Carnevalsvereineging De Maaskluivers is door stadsvastelaovendsvereineging De Tempeleers gevraog um ’t prinselek jäögkoppel te lievere.
De Maaskluivers kriege heimèt es derde Mestreechse vereineging d’n ier um de jäögprins en
-prinses ‘nen oonvergeteleke Vastelaovend te bezörge. Ieder kaom ’t jäöghoeglösteg koppel vaan De Kikkers oet Heugem-Randwyck en De Sjraveleirs oet Hier.
“Veer zien oontzèttend gruuts tot veer dit jaor ’t jäögpaar vaan Groet Mestreech mage lievere. Mie es oets kieke veer oet nao de Vastelaovend en veer goon same mèt De Tempeleers alles draon doen um de jäög vaan Hare en ’t prinselek koppel ‘nen oonvergeteleke tied te geve”, zeet Sven Grispen vaan CV De Maaskluivers.
’t Nui Jäögprinsepaar vaan Groet Mestreech weurt oetgerope op 25 jannewarie 2025.
’t Jäöghoeglösteg paar krijg, zjus wie d’n ‘echte’ Stadsprins ’n eige prinsekap en tiara en ‘nen eige scepter, ’n mini-versie vaan de scepter vaan d’n Hoegen Hoeglöstegheid.
Ouch krijg ’t koppel same mèt hunnen eige raod vaan èlf ’n oetgebreider program mèt de Vastelaovend. Zoe zien zie ieregas op ’t Groet Kinderfies en ’t Jäögprinsetreffe en jurylid bij de Kinderverseerwedstrijd én kinne zie hun eige Machseuverdrach.
Armand Peereboom vaan De Tempeleers: “Veer zien bij de twie ieder vereineginge tot de jäögvastelaovend ‘ne flinke impuls heet gekrege, en dat waor ein vaan de reie um dit initiatief te starte. Want ’t is toch de jäög wat de Vastelaovend vaan de touwkoms vörm moot goon geve. Es Tempeleers zien veer d’r gruuts op tot veer dao -via ’t jäöghoeglösteg koppel- aon kinne bijdrage.”