Mario Verhoeven ‘Vastelaovendsvierder vaan ’t jaor’
15 november 2024
Mario Verhoeven is bij de jaorvergadering vaan stadsvastelaovendsvereineging De Tempeleers oetgerope tot ‘Vastelaovendsvierder vaan ’t jaor’.
Mario is bekind es ‘Roedkepke’, de creatie boemèt heer edere Vastelaovend door Mestreech trek. Daoneve zaot heer bij Ziesjoem en bij De Köp. Veur deze gróppe sjreef heer ouch mierdere leedsjes, boe-oonder ‘Confetti’ dat ‘t Mestreechs Vastelaovendsleedsjeskonkoer in 2016 wón. Daoneve brach heer de Vastelaovend op Huize Maasveld boe heer de jaorlekse zitting organiseert en prizzenteert. Dat deeg Mario ieder bij Vijverdal en op de sjaole vaan zien kinder. Gebore en getoge in ’t hart vaan Mestreech kraog Mario de Vastelaovend mèt de paplepel ingegeve.
“’t Vastelaovendsvirus heet Mario noets mie losgelaote. Sterker: heer heet ’t op mierdere plaotse in Mestreech oetgedrage. Mario wèt door de ganse stad lui te enthousiasmere veur de Vastelaovend. Daoveur zien veer häöm zoe erkintelek tot veer häöm met plezeer tot ‘Vastelaovendsvierder 2024’ oetrope”, zeet Armand Peereboom, oetbelder vaan De Tempeleers.
De titel ‘Vastelaovendsvierder vaan ’t jaor weurt sinds 1957 touwgekind aon lui die höbbe laote zien euver Mestreechter Geis en vastelaovendsesprit te besjikke, mèt plezeer en sjariteit hoeg in ’t veendel. Op social media lete de Tempeleers de lèste weke menneg Vastelaovendsvierder de revue passere, oonder wee de ierste vierder Guy Vroemen, Pie Koch en May Ruijters-Schulkens. Vastelaovendsvierders vaan recentere daotum zien oonder mie de Kebouters en de Bende vaan Ketótsj.
De Vastelaovendsvierder vaan ’t jaor weurt geïerd mèt e mini-momuskenon en maag op vastelaovendszoondag bij ’t groete Momuskenon de negende sjeut euver de Vriethof losse.