Wee zwejt de scepter euver Mestreech in 2025?
17 september 2024
Zwere op ’t nejkiske vaan Vrouw Verzjevé, saluere nao ’t veendel vaan de Kachelpiepers, joonk en aajd opwerme veur de Vastelaovend, de mach hole in ‘t stadhoes en Mestreech veurgoon tijdens de drei zwoer meh plezerege daog vaan Vastelaovend. Stadscarnevalsvereineging De Tempeleers zeuk dé oetverkorene dee, same mèt zien partner, veer weke laank lètterlek de scepter zal zwejje euver de stad en ‘t vastelaovendvierend volk vaan Mestreech.
Kortum: de zeuktoch nao ‘De Groeten Oonbekinde’ weurt gestart.
Kint geer dee straolende en aimabele aonjaoger dee in edere vezel Vastelaovend veult, de Mestreechter Geis in zijn porië heet en euveral kin euverbringe, dee – bij väörkäör- maotsjappelek actief is en ’t Mestreechs beter sprik es de allerbèste?
Gef ‘m daan snel op veur ‘t sjoenste tijdeleke amb dat Mestreech kint.
Oetbelder Armand Peereboom vaan de Tempeleers: “E gezoon poortie humor is ‘n pré, zjus wie ’t kinne verbinde vaan alle soorte stadgenote bij zoewel de lach es de traon. De rol vaan zien (eventueel) partner weurt ouch ummertouw belaankrieker, dus veer zeuke ‘ne Stadsprins mèt rapportciefer 10, en ‘ne partner wat dao ‘n 11 vaan maak. Eder jaor vinde veer weer de allerbèste, en dat geit ouch veur 2025 oongetwiefeld weer lökke.”
De Tempeleers vraoge ‘t vastelaovendvierend volk um druimkandidaote zörgvöldeg en mèt
oetgebreide motivatie aon te drage. Gevraog weurt um de kandidaot zoe gróndeg meugelek te besjrieve en de veurdrach te veurzien vaan aktueel foto’s en rillevante kontakgegeves vaan de kandidaot. ‘t Formuleer en ‘t adres boe de veurdrach naotouw gesjik maag weure is HEI te vinde. De Tempeleers bewaore de aongedrage persoensgegeves neet langer es strik noedzakelek.
Um ‘t bès bewaorde geheim vaan Mestreech ier aon te doen, hawwe de Tempeleers de lippe stief opein euver eventuele veurdrachte en kin neet gecorrespondeerd weure euver de oetkoms. Zienen Hoegen Hoeglöstegheid zal weure oetgerope op zoondag 2 fibberwarie 2025 um 15.11 uur op de Merret.