Bekindmaking ‘Jäöghoeglösteg paar vaan Groet Mestreech’
6 jannewarie 2024
Nao ’t succesvol ierste jaor, maakde de Tempeleers al ieder bekind tot Zienen Hoegen Hoeglöstegheid ouch in 2024 weer versterking krijg vaan twie jonge prinseleke collega’s. Gruuts en mèt väöl plezeer proclamere de Tempeleers en CV de Sjraveleikres vendaog ‘t Jäöghoeglösteg paar vaan Groet Mestreech.
PRINS JOAQUIN I
29e Jäögprins vaan de Sjraveleirkes
2e Jäöghoeglöstegheid vaan Groet Mestreech
Joonkhier vaan alle Hierder kaffees
Protecteur vaan alle voetballers
Liechtend veurgenger vaan ’t nuie leech
Protecteur vaan de Mestreechter Jäögvastelaovend
PRINSES ZOË I
29e Jäögprinses vaan de Sjraveleirkes
2e Jäöghoeglöstegheid vaan Groet Mestreech
Joonkvrouw vaan apekeutelesjaol de Vlinderboum
Protectrice vaan alle peerdemeidskes
Liechtend veurgengster vaan ’t nuie leech
Protectrice vaan de Mestreechter Jäögvastelaovend
Joaquin I, in het börgerleve Joaquin Raven (zoon vaan Patrick en Nadja Raven, breurke vaan Elizsa Raven) is 10 jaor joonk en is op 28-10-2013 gebore in Mestreech.
Zien jäögprinselek pelies bevint zich op de Dörpstraot 27 in Mestreech.
Zoë I, in het börgerleve Zoë van Wijhe (dochter vaan Vicky Nouse, Kenneth Keerssemeeckers, Angelo van Wijhe en Roxane Stikvoort) is 10 jaor joonk en is op 14-09-2013 gebore in Mestreech. Häör jäögprinselek pelies bevint zich op de Max Planckstraot 6 te Mestreech.
In ‘t dageleks leve geit ‘t Jäöghoeglösteg paar nao sjaol op apekeutelesjaol de Vlinderboom.
Op sociaol maotsjappelek vlak höbbe zie ziech verdeenstelek gemaak bij oonder aandere voetbalclub RSKV Hier en Manege Cadier en Kier.
Vaanaof noe regere zie euver de Jäögvastelaovend in Groet Mestreech en zalle zie de koumende weke, neve of in harmonie mèt de gebrukeleke activiteite vaan de Sjraveleirkes, op ‘n aontal belaankrieke eveneminte hunne zwajeuzen entree make:
Zoondag 21 jannewarie: Kinderfies (Complex)
Zaoterdag 27 jannewarie: Bekindmaking winner Kinderexpositie (MUMC+)
Zaoterdag 3 fibberwarie: Jäögprinsetreffe (Sterzaol)
Machseuverdrach
Armand Peereboom, oetbelder vaan de Tempeleers: “Op donderdag 8 fibberwarie kump d’r ouch weer ‘nen echte jäögmachseuverdrach boe-in ’t jäöghoeglösteg paar de mach zal hole bij de kinderbörgemeister en -raod op ’t Stadhoes. Op verzeuk vaan de sjaole höbbe veer deveur gezörg tot dit ‘live’ in de klas kin weure gevolg via ‘ne livestream.
’t Nui leech
Netuurlek zal ’t paar ouch mèt de drei zwoer, meh plezerege daog acte de présence geve. Zoe zalle zie op vastelaovendszoondag bij d’n ingaank vaan ’t Theater aon ’t Vriethof de jäögvastelaovend in ’t bijzien vaan Zienen Hoegen Hoeglöstegheid officieel opene mèt ’n nui traditie in de Mestreechter Vastelaovend: ’t Optrekke vaan ’t Nui leech.
Aonsletend vergezèlle zie de Stadsprins nao ’t Momuskenon veur ’t insjete vaan de Vastelaovend en ’t optrekke vaan ’t Mooswief.
Tot slot sjittere zie in de Groeten Optoch en Femilie Optoch en op vastelaovendsdinsdag zalle zie roond 17.00 oor sirremonieel ’t Nui leech weer laote zakke um daomèt de Jäögvastelaovend vaan Mestreech aof te slete.