Medaajes: Brouwerskaar en Koonkelebol
8 jannewarie 2024
Zienen Hoegen Hoeglöstegheid deilt jaorleks hiel väöl medaajes oet. Die medaajes höbbe eder jaor ‘n aander thema. Dit jaor zien dat ‘De Brouwerskaar’ en ‘De Koonkelebol’.
Oetroopthema
‘De Brouwerskaar’ is daan ouch ‘t oetroopthema op zoondag 14 jannewari.
De Groeten Oonbekinde maak es hoofbrouwer zienen entree bij ‘t oetrope (15.11 oor). Veuraofgaond weurt de Groeten Oonbekinde in ’n cortège vaanaof de Statie, via de Stationstraot, Wycker Brögkstraot, Sint Servaosbrögk, Mestreechter Brögkstraot, Kleine Staat, Groete Staat en de Spèlstraot nao de Merret gebrach. Dees cortège vertrek um 14.00 oor.
Tempeleersmedaaje ‘De Brouwerskaar’
De Brouwerskaar is de naom vaan de Tempeleersmedaaje en is ‘n hommaasj aon al die kasteleins in Mestreech, die eus stad ’t zoe bekinde bourgondisch karakter mètgeve.
Ouch mèt Vastelaovend bedene zie d’n tap mèt vaste hand. De brouwerskaar woort in vreuger tije gebruuk um veers beer nao de kaffees te bringe. Alleweil zuut me de brouwerskaar nog wel ‘ns versjijne es speciaolbeer, zoewie lente- of herfsbeer weurt geprizzenteerd.
De Tempeleersmedaaje weurt traditioneel oetgereik in 4 versjèllende gradaties: Ridder, Offeceer, Kommandeur en Groet-Offeceer. Dee lètste is dit jaor veurzeen vaan ‘n ’Haolkan’ boe-in vreuger ’t beer verkoch woort.
Prinsemedaaje ‘De Koonkelebol’
De Prinsemedaaje kint es thema ‘De Koonkelebol’. In de vergetelhook geraak es kinderspäölselke meh op sjaol nog wel gerippeteerd in de gymlès. Bij ’t make vaan ‘ne koonkelebol steit de wereld effekes op z’ne kop en dat is noe zjus wat euze Mestreechter vastelaovend veur drei daog ouch deit.
De Kindermedaaje,
’t Kinderknuipke, is dit jaor gemaak door Liv Kievits oet gróp 7 vaan de John F. Kennedysjaol.
’t Knuipke weurt traditioneel geseerd door e clojnsgeziech.